Association of Southeast Asian Institutions of Higher Learning

Ing Association of Southeast Asian Institutions of Higher Learning or ASAIHL (Aguman da reng Institucion ning Matas a Pamanigaral kareng Bansa ning Mauli Aslagang Asia), metung yang aguman a e- pangkapamahalan (non-government organization o NGO) a mitatag kanitang 156 ba lang saupan deng institucion ning matas a pamanigaral ba reng pasikanan ing sarili da kapamilatan ning pamisaup-saup at ban makilala kareng aliwang bansa king pamanuru, pamanyaliksik at pamanyuyu king malda.

Mimiral ya ing Aguman bang isulung ing pamisaplalal da reng institucion, ing pamangambul ning metung a pamikilalang panglabwad (regional identity) at pamisaup-saup, at pamakitalamitam kareng aliwang aguman a panglabwad (ning Mawli Aslagang Asia) at pang-myayaliwang bansa a maki kaugnayan king pamanuru ampong pamanyaliksik. Magsilbi ya ing ASAIHL antimong:

• Centru ning informaciun
• Babye regular a pamakitagun bang pisabyan ing pamanalkus (development)/panyulung ning pamituru at pangkabilugang panyulung da reng universidad
• Saupan la reng kayang kayanib a institucion king pamanintun at pamamye katungkulan kareng talaturu
• Pamilibeng talaturu at magaral at pamigunyat king pamisaup-saup kareng particular a proyectu
• Pamagkalub king serbisyu da reng talausuk (consultant)
• Pamipasikan ning pamiugnayan kareng bukluran a panglabwad at pangyatu (international); pabalwan no reng kayanib a institucion tungkul king malilyari king labwad/rehiyon
• Kikilalanan na ing makayaliwa rang contribucion deng institucion ning matas a pamanigaral king Mawli Aslagang Asia